Më shumë se 10 ambulanca janë parë pranë shkollës islamike Al Khoziny në provincën Java Lindore të Indonezisë, e cila u shemb të hënën pasdite, duke bllokuar rreth 60 nxënës adoleshentë nën rrënoja. Sipas një dëshmitari për “Reuters”, ndihmat vijojnë ndërsa ekipet e shpëtimit po luftojnë me kohën për të gjetur të mbijetuar.

Ndërtesa u shemb gjatë kohës së lutjeve të pasdites, kur dhjetëra studentë të moshës 13 deri në 19 vjeç ndodheshin brenda. Shembja ndodhi pasi themelet nuk mundën të përballonin punimet e ndërtimit në katet e sipërme të strukturës.

Deri të enjten vonë, autoritetet konfirmuan pesë viktima dhe mbi 30 persona të plagosur që po trajtohen në spital. Pavarësisht përpjekjeve intensive, përfshirë përdorimin e sensorëve dhe thirrjeve nëpër rrënoja, ekipet e kërkim-shpëtimit nuk arritën të gjejnë shenja jete.

Al Khoziny është një pesantren – një shkollë islamike me konvikt – shumë e njohur në nivel lokal. Në Indonezi, vendi me popullatën më të madhe myslimane në botë, ekzistojnë rreth 42,000 pesantrenë që u shërbejnë mbi 7 milionë nxënësve.